Ünvanlı sosial yardımın məbləği artırılacaq

Gələn il ölkə üzrə yaşayış minimumu 15 manat artırılacaq. Bu, "Azərbaycan Respublikasında 2026-cı il üçün yaşayış minimumu haqqında" qanun layihəsində öz əksini tapıb. Belə ki, növbəti ildən yaşayış minimumu ölkə üzrə 300 manat, əmək qabiliyyətli əhali üçün 317 manat, pensiyaçılar üçün 245 manat, uşaqlar üçün 260 manat məbləğində müəyyən ediləcək. Bəs bu artım sosial müavinətlərə və pensiyalara necə təsir edəcək?

İqtisadçı Eldəniz Əmirov açıqlamasında bildirib ki, yaşayış minimumunun artması avtomatik olaraq bütün sosial ödənişləri artırmır, lakin bəzi ödənişlərə təsir göstərir. Çünki Azərbaycanda sosial ödənişlərin böyük hissəsi yaşayış minimumuna deyil, minimum əmək haqqına və ya ayrıca müəyyən edilmiş baza məbləğlərinə bağlıdır:

“Yaşayış minimumunun artması əsasən aztəminatlı ailələrin aldığı ünvanlı dövlət sosial yardımına birbaşa təsir göstərir. Məsələn, yaşayış minimumu 300 manata qalxıbsa, yardımın hesablanmasında istifadə edilən minimum təminat məbləği də avtomatik artır. Nəticədə, ünvanlı sosial yardım alan ailələrin aldıqları məbləğ yüksəlir. Eyni zamanda bəzi hallar ola bilər ki, əvvəlki qaydalara görə yardım ala bilməyən hansısa ailə, artımdan sonra yeni meyarlara uyğunlaşdığı üçün artıq yardım almaq hüququ qazanır”.

E.Əmirov qeyd edib ki, pensiyaların artması isə fərqli mexanizmlə baş verir:

“Pensiyaların artması, əsasən, əvvəlki ildə orta aylıq əməkhaqqının artım dinamikasına uyğun şəkildə bütün əmək pensiyalarının indeksləşdirilməsi hesabına həyata keçirilir”.

Qeyd edək ki, 2025-ci il üçün yaşayış minimumu ölkə üzrə 285 manat, əmək qabiliyyətli əhali üçün 305 manat, pensiyaçılar üçün 232 manat, uşaqlar üçün 246 manat məbləğində olub.

Aztvxeber.az